நான் உன்னை நேசிக்கின்றேன்

என் கருத்துக்கு மாறுபடுகிறாய்
உன் கருத்துக்கு நான் மாறுபடுகின்றேன்

உன் கொள்கை வேறு
என் கொள்கை வேறு

உன் கொள்கையில் உனக்கு பிடிப்பு
என் கொள்கையில் எனக்கு பிடிப்பு

உன் கொள்கையை என்னை ஏற்றுக் கொள்ள நீ வற்புறுத்தவில்லை
என் கொள்கையை உன்னை ஏற்றுக் கொள்ள நான் வற்புறுத்தவில்லை

உன்னால் யாருக்கும் தொல்லை இல்லை
என்னாலும் உனக்கு தொல்லை இல்லை

உலகில் பல நிறங்களில் மலர்களை கண்டு மனமகிழ்கின்றேன்
உலகில் பல கருத்துகளைக் கொண்ட மக்களைக் காண அதியக்கின்றேன்

உலகின் பல்வகை மக்களை படைத்தவன் இறைவன்
உலகில் ஒரே வகையில் அனைத்துமிருந்தால் வாழ்வில் விருப்பம் வர நாட்டம் வராது

உலகில் ஒரே சுவை இருந்தால் உண்பதற்கும் தேட்டம் வராது
உண்பதற்கு தேட்டம் அற்றுப்போக உடல் கெட்டுப் போகும்

மனைவியும் கருத்தில் மாறுபட்டவள்தான்
மனைவியும் பெற்றோர் விரும்பியதால் மணமுடிக்கப் பட்டவள்தான்

பழகப் பழக விரும்பாதவளும் விரும்பியவளானாள்
ஒதுங்கி நின்றிருந்தால் ஒதுங்கிப் போயிருப்பாள்

உறவு இருவரையும் மேன்மைப் படுத்தியது
உறவு ஒருவரை ஒருவர் அறிய வைத்தது

உறவை நாடாதவன் உள்ளதையும் இழப்பான்
உறவை நாடுபவன் விட்டுக் கொடுப்பான்

உறவை நாடுபவன் எதிரியாக யாரையும் நினையான்
விரோதம் ஒருநாள் பனிக்கட்டிபோல் கரையும்
விரோதம் போக பாசம் வரும்

பாசம் இறைவன் கொடுத்த அருளில் ஒன்று
இறைவன் கொடுத்த அருளில் ஒன்றையும் நான் இழக்க விரும்பவில்லை

நான் உன்னை நேசிக்கின்றேன்
நீயம் இறைவனால் படைக்கப் பட்டவன்