எதிரிக்கு எதிரி நண்பன்

நேற்று என் கொள்கைக்கு
மாற்றுக் கருத்து
இன்று எதிரி கொள்கைக்கு
மாற்றுக் கருத்து

உன் கருத்தை கேட்டேன்
என் கருத்துக்கு உடன்பாடு இல்லை
இன்று என் எதிரி கருத்துக்கு
மாற்று கருத்தை சொன்னாய்
நேற்று வரை நீ விரும்பத் தகாதவர்
இன்று என் எதிரி கருத்துக்கு
மாற்று கருத்தை சொன்னமையால்
என் நண்பனாய் உயர்வு பெற்றாய்

அதை ஓதாதே யென்றாய்
அதை ஓதுவது குற்றமா எனக் கூறி
ஓதுவதில் குற்றம் கண்ட  உன்னை
ஒதுக்கி வைத்தேன்

இன்று அதனை கேட்காதே
அந்த இடம் போகாதே என்று
அடம் பிடித்து அலறினாய்
உனது அலறல்
நான் நெடுநாள் விரும்பிய அலறல்.
உனது அலறல் என்னை
உன்னிடம் நெருங்க வைத்தது.
நாம் சேர்ந்து அலறுவோம்
நம் எதிரியை நசுக்க

நம் போரில் பாதிப்பு வரும்
ஓலமிட்டு ஒப்பாரி வைத்து
ஊரறிய மக்களை கூட்டி
ஒன்று கூடி எதிரியை
ஒழிக்க முற்படுவோம்
பார்ப்பவர் பார்க்கட்டும்
பார்த்தவர் பார்த்து சிரிக்கட்டும்

நம் செயல் நேர்மையோ! தவறோ!
நம் கொள்கை நம் எதிரியை
நாம் சேர்ந்து வீழ்த்த வேண்டும்.
மற்றவர் பார்த்து
நம்மையும் நம் எதிரியையும்
பார்த்து நகைக்க வேண்டும்